नाशिक : सध्या देशात असलेल्या अस्थिरतेच्या पार्श्वभूमीवर, तसेच प्रवाशांना दिल्या जाणाऱ्या दर्जात्मक आणि गुणात्मक सेवा याची पाहणी करण्यासाठी मध्य रेल्वेचे मुंबई येथील सहाय्यक महाव्यवस्थापक (एजीएम) डॉ. आर. बद्रीनारायण यांनी चार मार्च २०१९ रोजी नाशिक रोड रेल्वेस्थानकाला भेट दिली. स्थानकातील प्रवासी सुरक्षा व सुविधांबाबत त्यांनी समाधान व्यक्त केले. अधिकाऱ्यांना विविधस्तरावर सूचना देऊन प्रवाशांना त्रास होणार नाही याबाबत दक्षता घेण्याचे आदेश देण्यात आले.
या प्रसंगी स्टेशनमास्तर आर. के. कुठार, भुसावळचे वरिष्ठ तिकीट अधिकारी अजयकुमार, वरिष्ठ ‘डीसीएम’ आर. के. शर्मा, मुख्य वाणिज्य निरीक्षक कुंदन महापात्रा, अभियंता एस. जी. सैय्यद, गणेश पाटील, एम. बी. डोके, ‘आरपीएफ’चे वरिष्ठ निरीक्षक जुबेर पठाण, संजय गांगुर्डे आदी उपस्थित होते.
प्लॅटफॉर्म क्रमांक दोन, तीन आणि चारवरील सर्व सोयी-सुविधांची पाहणी करण्यात आली. यामध्ये रेल्वेस्थानकातील बुकिंग व रिझर्व्हेशन ऑफिस, सरकते जिने, रेल्वे सुरक्षा कार्यालय, सीसीटीव्ही नियंत्रण कक्ष आदींची पाहणी करून काही सूचना त्यांनी केल्या. स्थानकातील स्वच्छतेबाबत पाहणी करतानाच कंत्राटी सफाई कामगारांशी संवाद साधून त्यांना योग्य ते मानधन मिळते की नाही याची माहिती घेतली. या कामगारांना कागदोपत्री जेवढा पगार दाखवला जातो, त्यापेक्षा कमी पगार त्यांच्या हातात मिळतो असे पत्रकारांनी निर्देशनास आणून दिले असता कामगारांनीच याबाबत जागरूक राहावे, असे सांगतानाच ‘रेल दृष्टी’ या संकेतस्थळावर कंत्राटाची सर्व माहिती उपलब्ध असल्याची माहिती त्यांनी दिली.
सुरक्षेच्या दृष्टीने नाशिक रोड आणि देवळाली ही स्थानके महत्त्वाची मानली जात असल्यामुळे येथील कर्मचाऱ्यांची संख्या वाढविण्यासंबंधीही काही उपाययोजना करणार असल्याचे ते या वेळी म्हणाले.
सध्या भारतातील काही ठिकाणे हाय अलर्टवर आहेत. त्या पार्श्वभूमीवर नाशिक रोड, देवळाली या लष्कराशी संबंधित रेल्वेस्थानकातही हाय अलर्ट जारी केला आहे. लष्करी जवानांच्या वाहतुकीसाठी दोन्ही रेल्वेस्थानके सज्ज असून, इतर रेल्वेस्थानकांनाही दक्ष राहण्याच्या सूचना देण्यात आल्या आहे. देवळाली कॅम्पहून जवानांच्या रेल्वेगाड्या रवाना होत असल्यामुळे ते स्टेशनही सतर्क आहे. नाशिक रोड रेल्वेस्थानकावरून दररोज सुमारे वीस हजार प्रवासी प्रवास करतात. त्यामुळे येथे कडेकोड सुरक्षेची व्यवस्था करण्यात आली आहे.